AUSWANDERERBLOG

(—)

Ds Team vom Profässer Schulze het de aui Dörfer u Wyler vo Grossaffouteren unger d Lupe gno. Z Subärg hei si vernoo, heig vor viiune, viiune Jahr es Ehepaar buret, wo beide im Nazionaurat gsi syge. Wiu si aber chli angersch buret u chli angersch politisiert heigen aus di angere Subärger, heig me chli Müeh gha mit ne. U de syge sy haut uf Südfrankrych züglet u bewirtschafti dört e Farm, wo grösser syg aus dr ganz Kanton Bärn, u dank den Agrarsubvänzione vor EU syge di Buumes steirych worde.

Em Profässer Schulze isch di Gschicht gspässig vorcho un är het zwe vo synen Assischtänte, dr Urs Rüedisühli, e Zürcher, wo z Berlin doktoriert, u d Ulrike von Hohenzollern-Gütersloh, zu dene Buumes uf das Südfrankrych gschickt. Nach ere Wuche sy di beide ganz begeischteret zrügg cho u hei verzeut, di Stefanie u dä Ruedi syge ganz flotti Lüt, u steirych syge si oo, aber nid wäg den EU-Subvänzione, nei, wiu si sech au Wuchen e Wageladig vo däm biologisch-dynamische Hauert- Dünger löie la lifere, u me dank däm Dünger chönn zueluege, wi d Sunnebluemen u d Härdöpflen u Sparglen u d Chirschi wachsi u me fasch nid nache mögi mit ärnte.

U itz, hei dr Urs u d Ulrike, wo unger dr heisse südfranzösische Sunnen es Paar worde sy, hei di beide wyter verzeut, itz wöu di auti Dame, di Stefanie, z Subärg e Bsuech machen u de Subärger es Gschänk aakündige, en Ungerfüerig unger de Bahngleis düre, auerdings numen unger gwüsse Bedingige. Was das für Bedingige syge, heig ne d Stefanie nid wöue verraate, si heig nume gseit, so öppis Strubs wi bim Dürrenmatt syg’s de öppe nid. Dr Urs u d Ulrike vermuete, dass es um öppis Soziaus oder Ökologisches göng. Vilech wüsse mer de meh, we mer im Herbscht d Uffüerig vom Theater Grossaffoutere göh ga luege. Di probe scho itz en aktualisierti Fassig vom Besuch der alten Dame. Das Stück wott dr Simon Buume ja de o no verfiume, un es würd eim nid verwungere, we d Stefanie dr Oskar überchiem für di beschti Houptroue u dr Ruedi dä für di beschti Näberoue.